മുഖ്യമന്ത്രിക്കെതിരെയുള്ള കേസ്: ഭീഷണിപ്പെടുത്തി ഉത്തരവ് നേടാമെന്ന് കരുതേണ്ടെന്ന് കോടതി
Monday, 21 March 2011
തിരുവനന്തപുരം: മുഖ്യമന്ത്രി വി.എസ്.അച്യുതാനന്ദന്‍, സി.പി.എം നേതാവ് പി.ശശി എന്നിവര്‍ക്കെതിരെ അന്വേഷണത്തിന് ഉത്തരവിടണമെന്ന ആവശ്യത്തിന് കോടതി വഴങ്ങിയില്ല. കോടതിയെ ഭീഷണിപ്പെടുത്തി അന്വേഷണ ഉത്തരവ് നേടാമെന്ന് കരുതേണ്ടതില്ലെന്നും മജിസ്‌ട്രേട്ട് പറഞ്ഞു. ജസ്റ്റിസ് മോഹന്‍കുമാര്‍ കമ്മീഷനെ സ്വാധീനിച്ചെന്ന് ആരോപണമുള്ള വി.എസിനും ശശിക്കുമെതിരെ അന്വേഷണം ആവശ്യപ്പെട്ട് നടന്ന വാദത്തിനിടെയാണ് കോടതി പരാമര്‍ശമുണ്ടായത്. കൂടുതല്‍ വാദം കേള്‍ക്കാന്‍ കേസ് മാര്‍ച്ച് 28 ലേക്ക് കോടതി മാറ്റി.
തിങ്കളാഴ്ച തിരുവനന്തപുരം ചീഫ് ജുഡീഷ്യല്‍ മജിസ്‌ട്രേട്ട് ചെറിയാന്‍ വര്‍ഗീസാണ് ഹര്‍ജി പരിഗണിച്ചത്. പരാതിക്കാരനായ വിഴിഞ്ഞം സ്വദേശി തല്‍ഹത് ഇസഹാക്കിനുവേണ്ടി ഹാജരായ അഡ്വ.സാന്‍ടി ജോര്‍ജ് വി.എസിനെതിരെ അന്വേഷണമാവശ്യപ്പെട്ടു.
ഹര്‍ജിയിന്മേല്‍ എന്തുനടപടി എടുക്കണമെന്നത് കോടതിയുടെ വിവേചനാധികാരത്തില്‍പ്പെടുന്നതാണെന്ന് മജിസ്‌ട്രേട്ട് അഭിപ്രായപ്പെട്ടു. പ്രതിപ്പട്ടികയില്‍ പറയുന്നവരുടെ മേല്‍വിലാസം ഹര്‍ജിയിലില്ല. അന്വേഷണത്തിന് ഉത്തരവിടുകയല്ലാതെ മറ്റ് മാര്‍ഗങ്ങളില്ലെന്ന അഭിഭാഷകന്റെ വാദം ശരിയല്ല. ഹൈക്കോടതി വിധി ഉണ്ടായതുകൊണ്ട് നിയമത്തിലെ വ്യവസ്ഥകള്‍ മാറില്ല.
കൂടുതല്‍ വാദം കേള്‍ക്കണമെന്നും ഹര്‍ജി മാര്‍ച്ച് 28ന് വീണ്ടും പരിഗണിക്കാമെന്നും പറഞ്ഞ് കോടതി കേസ് 28-ലേക്ക് മാറ്റി.
കല്ലുവാതുക്കല്‍ മദ്യദുരന്തം അന്വേഷിച്ച ജസ്റ്റിസ് മോഹന്‍കുമാറിനെ സ്വാധീനിക്കാന്‍ വി.എസും ശശിയും ശ്രമിച്ചെന്നാണ് ഹര്‍ജിയിലെ ആരോപണം.
0 comments:
Post a Comment